Ngaran Dalam Budaya Urang Banjar
Kakanakan Urang Banjar imbah diranakakan, masih habang, balalu dibari ngaran. Disambat batasmiah, bisa salajur baakikah, manyumbalih kambing atawa kibas, basaruan kadang warga di kiwa kanan.Balalu ada nang mangaji Qur’an, surah Ali Imran ayat 33 sampai 38. Ngaran nang rasmi disambatakan ulih tuan guru, tarus dipapai di bumbunan awan kikipik papaian minyak baburih sambil mambaca salawat. Tuntung, imbah itu makanan.
Anak ngitu tadi imbah sudah baumur pitu atau sangang tahun, inya dikiau anang atawa nanang, atawa galuh (Banjar Kuala), atawa utuh, galuh, diang atawa idang (Banjar Hulu). Ngaran nang aslinya bisa sudah kalumpanan, ngaran kiawan hari-hari nang rikit barikit.
Apabila sudah ganal atawa satangah tuha, ada di kampung nitu dua atawa talu ikung nang dikiau utuh, Supaya jangan tapahuya, tasarbu ngaran sama, balalu ditambahi kiawan lain gasan mambida akan, nang mana urangnya. Balalu ada Utuh Apam (inya bajual apam), Utuh Garau (inya bapandir garau), Utuh Tapih (inya kada mahir basalawar batapih haja).
Damintu jua nang bangaran Anang (Banjar Kuala), ada nang dikiau Anang Umpal (inya lagi halus umpal makan iwak, barikit ngaran sampai katuha). Mintu jua ada Anang Sigil, Anang Tukul, Galuh Bungas, Galuh Bingking, Diang Ikal, Idang Darat, awan ngarannya nangini:
- Utuh nang basar, ngarannya jadi Tubasar
- Utuh nang kacil, ngarannya jadi Tukacil
- Utuh nang halus, ngarannya jadi Tuhalus
- Utuh nang lamak, ngarannya jadi Tulamak
- Utuh nang ganal, ngarannya jadi Tuganal
- Utuh nang hacut, ngarannya jadi Tuhacut
- Utuh nang hanil, ngarannya jadi Tuhanil
- Utuh nang hirang, ngarannya jadi Tuhirang
- Utuh nang habuk, ngarannya jadi Tuhabuk
Ngaran nangitu haja urang nang tahu di kampung. Ngaran aslinya sudah kalumpanan. Wayah bahari balum ada ngaran basirtifikat. Paling banyak dicatat di buncu parukunan.
Sumber: Ngaran Dalam Budaya Urang Banjar. DMA HM Syamsiar Seman. / http://kabarbanjarmasin.com/posting/ngaran-dalam-budaya-urang-banjar.html
Re-Post by http://migoberita.blogspot.co.id/ Minggu/1604207/11.38Wita/Bjm
